Ársæll og Varðan í Messu

Á sunnudaginn 15. janúar var haldin fjölmenn guðsþjónusta með þátttöku félaga úr slysavarnadeildinni Vörðunni og björgunarsveitinni Ársæli. Fyrir utan kirkjuna var sýning á einni af bifreiðum Ársæls og björgunarbátnum Höllu Jónsdóttur. Í forkirkju voru myndir og munir frá báðum aðilum til sýnis.

Félagarnir Birna E. Óskarsdóttir og Hörður Kjartansson lásu ritningarlestra. Petrea Ingibjörg Jónsdóttir, stjórnarmaður Vörðunnar flutti stutta hugleiðingu ásamt Borgþóri Hjörvarssyni, formanni Ársæls. Erna Nielsen, Bára Jónsdóttir og Hörður Kjartansson lásu bænir.

Í lok guðsþjónustu afhenti Petrea Ingibjörg Jónsdóttir formanni sóknarnefndar, Guðmundi Einarssyni peningagjöf frá Vörðunni upp á kr. eitt hundrað þúsund krónur. Sóknarnefnd færir konunum í Vörðunni innilegustu þakkir fyrir höfðinglega gjöf. Þessir peningar munu koma sér vel vegna viðgerðar á snjóbræðslukerfinu sem er undir hlaði kirkjunnar. Er það sannarlega mikilvægt slysavarnarverkefni.

Konurnar í Vörðunni buðu síðan kirkjugestum upp á glæsilegt kaffihlaðborð að guðsþjónustu lokinni. Sóknarprestur og organisti þjónuðu í athöfninni ásamt félögum í Kammerkór kirkjunnar.