Helgistund í Albertsbúð á Gróttudaginn

Laugardaginn 21. apríl var helgistund í Albertsbúð á Gróttudegi. Sóknarprestur og Kári Allansson, organisti, sáu um stundina. Í helgistundinni voru sungnir sálmar og sumarlög. Við þökkum Rótarýklúbbnum á Seltjarnarnesi fyrir afnotin af Albertsbúð, sem er í eigu klúbbsins. Klúbbfélagar endurbættu og endurreistu Albertsbúð á sínum tíma, en þar halda þeir fundi sína af og til.

Setning listahátíðar Seltjarnarneskirkju

Setning listahátíðar Seltjarnarneskirkju fór fram laugardaginn 14. apríl að viðstöddu fjölmenni. Dr. Gunnlaugur A. Jónsson, prófessor, flutti erindið ,,Biblían og menningin.” Tónlist var í höndum þeirra Friðriks Vignis Stefánssonar, organista, Guðrúnar Helgu Stefánsdóttur, sópransöngkonu og Fannýjar K. Tryggvadóttur, þverflautuleikara. Aðalsteinn Ingólfsson, listfræðingur flutti erindi um Karólínu Lárusdóttur og myndlist hennar, en Karólína er myndlistarmaður listahátíðar. Hún hefur málað 12 vatnslitamyndir sem sýna atburði úr líf Jesú. Þessar myndir prýða Seltjarnarneskirkju og verða til sýnis fram til 28. apríl, er listahátíðinni lýkur.

Dagskrá listahátíðarinnar og flytjendur.

Norðurkjallari Seltjarnarneskirkju málaður

Þeir Jón Jónsson, Stefán Olgeirsson og Gunnar Gunnarsson, sem allir eru félagar í karlaklúbbnum er hittist tvisvar í viku í kirkjunni, hafa látið hendur standa fram úr ermum að undanförnu. Þeir hafa tekið sig til og málað norðurkjallara kirkjunnar. Við þökkum fyrir framlag þeirra sem við metum mikils. 29. apríl næstkomandi verða gömlu dansarnir í þessum nýmáluðu og huggulegu húsakynnum eftir messu.

Sunnudagaskólanum slitið á þessu vori

Heilsugangan var farin á undan athöfn. Gengið var frá kirkjunni kl. 9.30. Eftir gönguna fékk fólk sér kaffi í safnaðarheimilinu og að því loknu tók það þátt í gleði barnanna í fjölskylduguðsþjónustu í kirkjunni.

Sunnudagaskólanum lauk svo formlega sunnudaginn 15. apríl. Ari trúður kom í heimsókn ásamt vinkonu sinni. Starfsfólk sunnudagaskólans þjónaði ásamt sóknarpresti og organista kirkjunnar. Stundin tókst vel. Boðið var upp á pylsur og svala eftir athöfn. Sunnudagaskólinn er kominn í sumarfrí, en hefst aftur í byrjun september.