Fræðslumorgunn og grannaguðsþjónusta í Seltjarnarneskirkju 26. febrúar

Fræðslumorgunn fór fram kl. 9.45-10.30 í kjallara Seltjarnarneskirkju. Valgeir Gestsson, fyrrverandi skólastjóri, sagði frá hjólaferð sinni og konu sinnar, Áslaugar Ármannsdóttur, frá Berlín til Kaupmannahafnar, á liðinu sumri, í máli og myndum.

Grannaguðsþjónusta var haldin í Seltjarnarneskirkju 26. febrúar síðastliðinn. Íbúar úr Eiðismýri, Suðurmýri, Tjarnarmýri, Grænumýri, Kolbeinsmýri, Tjarnarstíg og Tjarnarbóli tóku virkan þátt í guðsþjónustunni. Guðmundur Einarsson og Svana Helen Björnsdóttir lásu ritningarlestra. Guðmundur Snorrason las bænir og Hrafnhildur B. Sigurðardóttir las lokabæn. Arnþór Helgason kvað sjö erindi úr fyrsta passíusálminum í þessari útvarpsguðsþjónustu. Helga Svala Sigurðardóttir lék á þverflautu. Organisti kirkjunnar þjónaði ásamt Kammerkór kirkjunnar. Íbúar fyrrnefndra gatna buðu upp á glæsilegt kaffihlaðborð. Sunnudagaskólinn var á sama tíma í kirkjunni.

Mikið um að vera á konudaginn í Seltjarnarneskirkju.

 

Á fræðslumorgni sagði  Torfhildur Rúna Gunnarsdóttir frá ferð sinni frá Suður-Frakklandi til Spánar (Santiago de Compostella), sem er hinn forni Jakobsvegur pílagrímanna. Hún gekk alla þessa leið, um 900 kílómetra á liðnu ári. Frásögnin var sérlega áhugaverð frásögn í máli og myndum.
Kl. 10.45 var stutt athöfn á Valhúsahæð, þar sem Auður djúpúðga og Guðrún Ósvífursdóttir munu komu við sögu. Þær gerðu bæn sína í Krosshólaborg og á Helgafelli. Valhúsahæðin var samnefnari fyrir þá staði í þessari stuttu athöfn.  Nokkrar konur úr  Kvenfélaginu Seltjörn klæddust búningum frá víkingaöld og fóru m.a. í gervi þessara kristnu kvenna frá söguöld.
Guðsþjónusta á konudaginn hófst í Seltjarnarneskirkju kl. 11.
Konur úr Kvenfélaginu Seltjörn tóku þátt í athöfninni. Ritningarlestra lásu þær Erna Kristinsdóttir Kolbeins og Birna E. Óskarsdóttir. Málfríður Finnbogadóttir, verkefnisstjóri á Bókasafni Seltjarnarness, flutti hugleiðingu. Formaður Seltjarnar, Rannveig Ívarsdóttir, flutti ávarp, og afhenti Seltjarnarneskirkju peninga að gjöf, eitthundrað þúsund krónur. Guðmundur Einarsson, formaður sóknarnefndar tók við þessari glæsilegu gjöf sem við þökkum innilega fyrir.
Sóknarprestur og organisti kirkjunnar þjónuðu ásamt félögum úr Kammerkór kirkjunnar. Allir sálmar og lög sem sungin voru í guðsþjónustunni tengdust konum. Sunnudagaskóli var á sama tima í kirkjunni.
Eftir guðsþjónustu bauð Kvenfélagið upp á matarmikla landnámssúpu.

Hressir karlar spila billjard

billjard1

.

Á mánudags- og fimmtudagsmorgnum  spila hressir karlar billjard í kjallara Seltjarnarneskirkju. Eru þetta miklar kempur sem kunna vel á kjuðana. Á myndunum hér má sjá einn þeirra, Stefán Olgeirsson sýna snilldartakta. Hinir karlarnir fylgjast spenntir með og bíða eftir að röðin komi að þeim.

billjard3

Formaður VR prédikaði á Biblíudaginn

Stefán Einar Stefánsson, guðfræðingur og formaður VR prédikaði á Biblíudaginn í Seltjarnarneskirkju 12. febrúar síðastliðinn. Var góður rómur gerður að prédikun hans. Ritningarlestra fluttu sóknarnefndarmennirnir dr. Gunnlaugur A. Jónsson og Hrafnhildur B.Sigurðardóttir. Guðmundur Einarsson, formaður sóknarnefndar flutti lokabæn. Sóknarprestur og organisti þjónuðu ásamt félögum úr Kammerkór Seltjarnarneskirkju í þessari útvarpsguðsþjónustu. Sunnudagaskólinn var á neðri hæð kirkjunnar á sama tíma. Glæsilegar kaffiveitingar voru frambornar í safnaðarheimilinu að guðsþjónustu lokinni. Biblíusýning er í fordyri kirkjunnar og í safnaðarsal. Umrædd sýning munstanda yfir fram að næstu helgi.

Guðni Ágústsson ræðumaður á þorragleði

Hin árlega þorragleði fyrir eldri borgara var haldin 7. febrúar í Seltjarnarneskirkju. Rúmlega 70 manns tóku þátt í gleðinnni er hófst kl. 11 þar sem sóknarprestur stýrði helgistund og organisti lék undirsálmasöng. Guðni Ágústsson, fyrrverandi ráðherra flutti svo hátíðarræðu í kirkjunni og sló í gegn eins og hans er von og vísa.

Skömmu fyrir hádegi fóru allir viðstaddir yfir í safnaðarheimilið þar sem boðið var upp á ilmandi þorramat sem smakkaðist afar vel. Kirkjuverðirnir, þær Svava og Sigríður töfruðu fram þennan frábæra mat af sinni alkunnu snilld.

Organisti mætti svo með nikkuna og tók fólk undir vel þekkt lög eins og Þorraþræl, Fyrr var oft í koti kátt og fleiri lög.