Fjölmenni á Degi aldraðra í Seltjarnarneskirkju – 9. maí

Á annað hundrað manns sóttu guðsþjónustu í Seltjarnarneskirkju á uppstigningardag, 9. maí kl. 11. Ingibjörg Hannesdóttir, fyrrverandi leikskólakennari, flutti hugleiðingu. Ingibjörg býr á Kirkjubrautinni og sat í sóknarnefnd Seltjarnarneskirkju um árabil. Sönghópur eldri bæjarbúa er heitir Gömlu meistararnir sungu í guðsþjónustunni.  Rúmlega sjötíu eldri borgarar úr Garðabæ tóku þátt í guðsþjónustunni ásamt sr. Friðriki J. Hjartar, presti í Garðabæ. Tveir þeirra Garðbæinganna lásu ritningarlestra, hjónin Kristján Þorgeirsson og Dóra Diego. Sr. Bjarni Þór Bjarnason, sóknarprestur, þjónaði, ásamt Friðriki Vigni Stefánssyni organista. Undir lok guðsþjónustunnar þakkaði sr. Friðrik J. Hjartar fyrir móttökur og færði söfnuði Seltjarnarneskirkju bækur að gjöf frá söfnuði Vídalíns- og Garðakirkju. Öllum viðstöddum var boðið að þiggja glæsilegar veitingar í safnaðarsal kirkjunnar. Meðan á borðhaldi stóð lék Friðrik organisti undir almennan söng á harmóníku og á flygil. Kl. 10.30 á undan guðsþjónustunni flutti Guðmundur Einarsson stutt erindi fyrir Garðbæinga um Seltjarnarneskirkju í sögu og samtíð.

Við þökkum öllum er lögðu fram krafta sína í þessari guðsþjónustu.   

Heilsa og ræktun – frumkvöðlar í Nesi

 Fyrirlestur um eplatré og nytjajurtir í garði Björns apótekara

Yfirskrift sunnudagsins 5. maí í Seltjarnarneskirkju var: ,,Heilsa og ræktun – frumkvöðlar í Nesi, Bjarni Pálsson, landlæknir og Björn Jónsson, lyfsali. Jóhanna Þ. Guðmundsdóttir, sagnfræðingur, flutti áhugaverðan fyrirlestur í tilefni dagsins í Norðursal kirkjunnar kl. 10 fyrir hádegi. Heiti hans var: ,,Eplatré og nytjajurtir í garði Björns Jónssonar, apótekara í Nesi við Seltjörn.” Alls komu 25 manns á fyrirlesturinn og þökkum við Jóhönnu kærlega fyrir.

Lilja Sigrún Jónsdóttir, læknir, flutti hugleiðingu í guðsþjónustu 5. maí. Guðsþjónustan hófst kl. 11. Lilja Sigrún Jónsdóttir, læknir og verkefnisstjóri hjá Embætti landlæknis, flutti hugleiðingu í guðsþjónustunni. Sunnudagaskóli var á sama tíma í kirkjunni. Kristín Einarsdóttir, formaður stjórnar Lyfjafræðisafnsins í Nesi og Vigdís Hallgrímsdóttir, hjúkrunarfræðingur, lásu ritningarlestra. Sr. Bjarni Þór Bjarnason, sóknarprestur, þjónaði í athöfninni ásamt Glúmi Gylfasyni, organista. Félagar úr Kammerkór kirkjunnar sungu.

Í fordyri kirkjunnar var sýning á myndum af lækningajurtum og tækjum og áhöldum til lyfjagerðar. Kaffiveitingar voru í boði Björnsbakarís. Við þökkum kærlega fyrir rausnarskap þess góða fyrirtækis.

Lyfjafræðisafnið í Nes var opið frá kl. 13-14 í tilefni dagsins. 

Lionsguðsþjónusta 28. apríl – höfðingleg gjöf

Sunnudaginn 28. apríl var guðsþjónusta og sunnudagaskóli í Seltjarnarneskirkju að venju kl. 11.

Lionsmenn tóku þátt í athöfninni. Ægir Ólason og Gunnar Pálsson lásu ritningarlestra. Örn Johnson las bænir og Guðjón Jónsson las lokabæn. 

Selkórinn söng í guðsþjónustunni undir stjórn Oliver Kentish. Organisti var Bjarni Þór Jónatansson.

Bragi Ólafsson,formaður Lionsklúbbs Seltjarnarness færði söfnuði Seltjarnarneskirkju 250 sálmabækur að gjöf, er Guðmundur Einarsson, formaður sóknarnefndar, tók við,  fyrir hönd safnaðarins.

Við þökkum innilega fyrir þessa höfðinglegu gjöf. Um er að ræða nýjar sálmabækur sem eru sérmerktar nafni kirkju og gefenda. Guðmundur afhenti af þessu tilefni Braga þakkarskjal sem er undirritað af sóknarpresti og formanni sóknarnefndar. Lionsmenn buðu öllum viðstöddum að þiggja glæsilegar veitingar í safnaðarsal Seltjarnarneskirkju að athöfn lokinni. Hafi þeir bestu þakkir fyrir það.

Fleiri greinar...