Guðsþjónusta á kristniboðsdaginn 11. nóvember

Guðsþjónustu á kristniboðsdaginn var útvarpað frá Seltjarnarneskirkju. Sr. María Ágústsdóttir þjónaði fyrir altari í fjarveru sóknarprests er var með minningarstund um látna hermenn í Fossvogskirkjugarði á sama tíma. Fanney Kristrún Ingadóttir, kristniboði, flutti hugleiðingu. Organisti og félagar úr Kammerkór kirkjunnar sungu. Sunnudagaskólinn var á sama tíma. Sýning var í anddyri kirkjunnar á ýmsum munum og myndum er tengjast kristniboðinu. Kaffiveitingar.

olafur_johannssonFræðslumorgunn kl. 9.45-10.30

Ólafur Jóhannsson sagði frá ferðum til Ísraels í máli og myndum. Áhugaverð frásögn frá Landinu helga. Við þökkum Ólafi fyrir frásögnina.

Húsfyllir í kaffihúsaguðsþjónustu 4. nóvember

Húsfyllir var í kaffihúsaguðsþjónustu 4. nóvember í Seltjarnarneskirkju. Fermingarbörn tóku þátt í athöfninni og lásu lestra og bænir. Þau tóku á móti fólki er það kom til kirkju. Litlu snillingarnir og Gömlu meistararnir sungu tvö lög undir stjórn Ingu Bjargar Stefánsdóttur og Friðriks Vignis Stefánssonar. Félagar úr Kammerkórnum sungu. Silja Björg Kjartansdóttir lék á fiðlu og Tómas Helgi Kristjánsson, er fremdist í kirkjunni í vor söng einsöng. Sr. Bjarni Þór Bjarnason, sóknarprestur þjónaði ásamt starfsfólki sunnudagaskólans.

Fermingarbörnin sáu um kaffihús í safnaðarheimilinu að lokinni athöfn og söfnuðu peningum fyrir innanlandsaðstoð Hjálparstarfs kirkjunnar með því að taka á móti frjálsum framlögum. Alls söfnuðust tæplega 85 þúsund krónur. Fermingarbörnin gengu um beina og báru fram skúffuköku með þeyttum rjóma, en þau komu sjálf með allar veitingar að heiman. Friðrik Vignir lék kaffihúsatónlist og félagar úr Kammerkórnum sungu. Við þökkum fermingarbörnum og fjölskyldum fyrir framlag þeirra.

Frásögn og myndir frá Ekvador og Galapagoseyjum

Hrafnhildur B. Sigurðardóttir flutti frábæran fyrirlestur á fræðslumorgni 4. nóvember um ferð til Ekvador og Galapagos í máli og myndum. Fyrirlesturinn var vel sóttur og við þökkum Hrafnhildi fyrir.

Fjölbreytilegt starf 28. október í Seltjarnarneskirkju

Segja má, að það hafi verið fjölbreytilegt starfið í Seltjarnarneskirkju sunnudaginn 28. október. Fræðslumorgunn var haldinn í Norðusal kirkjunnar kl. 9.45-10.30. Hjónin Svana Helen Björnsdóttir og Sæmundur Elías Þorsteinsson sögðu frá ferð sinni til Þýskalands á slóðir Marteins Lúthers í ágúst síðastliðnum. Frásögn þeirra var í máli mog myndum og var hin fróðlegasta. Fjölmenni var viðstatt fyrirlesturinn.

Guðsþjónustan var einnig fjölsótt. Íbúar af Ströndunum á Nesinu tóku þátt. Guðmundur Einarsson og Halldór Árnason lásu ritningarlestra. Sunnudagaskólinn var á sama tíma í kirkjunni. Bryndís Emilsdóttir og Guðrún B. Vilhjálmsdóttir lásu bænir. Organisti kirkjunnar, Friðrik Vignir Stefánsson þjónaði ásamt félögum í Kammerkór Seltjarnarneskirkju. Kórinn söng m.a. enska sálminn Be still for the presence of the Lord, sem var til kynningar, við bíðum eftir íslenskum texta við þann sálm sem koma mun innan tíðar. Sr. Bjarni Þór Bjarnason, sóknarprestur þjónaði fyrir altari. Íbúar á Ströndunum buðu upp á glæsilegt kaffihlaðborð í lok guðsþjónustu. Við þökkum fyrir framlag íbúanna. Í anddyri kirkjunnar var opnuð sýning á nokkrum málverkum eftir Rúnu Gísladóttur ásamt sýningu á myndum og bókum sem tengjast Marteini Lúther.

Biblíuleshópur í Seltjarnarneskirkju

bibliuleshopur
Miðvikudagskvöldið 31. október mun biblíuleshópi verða hleypt af stokkunum í Seltjarnarneskirkju. Hópurinn mun hittast hálfsmánaðarlega á miðvikudagskvöldum kl. 20.  Sigríður Nanna Egilsdóttir mun leiða þetta starf.
Fyrra korintubréf verður lesið og rætt á þessum kvöldum. Hver biblíulestur stendur yfir í tvo klukkutíma með góðri kaffipásu.
Allir hjartanlega velkomnir.

Fræðslumorgunn og guðsþjónusta 21. október

Ólafur Valur Sigurðsson, fyrrverandi skipherra, sagði frá ferð sinni  á skútu frá Seattle til Alaska í Bandaríkjunun á fræðslumorgni. Frásögn Ólafs var í senn skemmtileg og fræðandi. Fræðslumorguninn var fjölsóttur og við þökkum Ólafi Vali kærlega fyrir framlag hans.

Guðsþjónustan var fjölsótt. Konur í Soroptimistaklúbbi Seltjarnarness tóku þátt. Ávarp flutti Hrafnhildur B. Sigurðardóttir. Petrína Ó. Þorsteinsdóttir og Sólveig Pálsdóttir lásu ritningarlestra. Björk Hreinsdóttir og Sigríður Siemsen lásu bænir. Ásrún Kristjánsdóttir og Ósk Ingvarsdóttir tóku á móti kirkjugestum. Ingibjörg Bergsveinsdóttir las ljóð eftir Guðrúnu Jóhannsdóttur frá Brautarholti, en klúbburinn gaf út bókina Minningar eftir hana fyrir nokkrum árum. Í forkirkju var sýning um Guðrúnu þar sem ljóðabækur hennar og verk voru til sýnis, en hún var vel að sér til munns og handa. Ingibjörg svaraði nokkrum spurningum um líf og störf Guðrúnar, en hún er dóttir hennar.

Sóknarprestur þjónaði í athöfninni ásamt Ólafi Finnssyni er leysti Friðrik Vigni af í þessari athöfn. Félagar úr Kammerkór kirkjunnar sungu sálma og jafnframt lag eftir Bodil Guðjónsson við texta Guðrúnar Jóhannsdóttur er heitir Bæn. Sunnudagaskólinn var á sama tíma í kirkjunni. Konur í Soroptimistaklúbbnum buðu upp á glæsilegt kaffihlaðborð. Við þökkum fyrir þjónustu þeirra.